ජාතික පොලිස් කොමිෂන් සභාවට සාදරයෙන් පිළිගනිමු

ජාතික පොලිස් කොමිෂන් සභාව සදහා සභාපතිවරයකු සහ සමාජිකයින් පත් කිරීම.

ආණ්ඩුක්‍ර‍ම ව්‍යවස්ථාවේ 21 වන සංශෝධනය යටතේ ස්ථාපිත කරන ලද ජාතික පොලිස් කොමිෂන් සභාව සදහා අතිගරු ජනාධිපතිතුමා විසින් සභාපතිවරයකු සහ සාමාජිකයින් හතරදෙනෙකු පත් කරනු ලැබ ඇත. ශ්‍රි ලංකා පාර්ලිමේන්තුවේ කථානායකවරයා මුලසුන දරන සාමාජිකයින් 10 දෙනෙකුගෙන් සමන්විත ආණ්ඩුක්‍ර‍ම ව්‍යස්ථා සභාවේ නිර්දේශය මත ජනාධිපතිතුමා මෙම පත් කිරිම් සිදු කර ඇත. ඒකී පත්කිරීම් අනුව, සභාපතිවරයා සහ පහත සදහන් සාමාජිකයින් බණ්ඩාරණායක අනුස්මරණ ජාත්‍යන්තර සම්මන්ත්‍ර‍ණ ශාලා පරිශ්‍රයේ පිහිටා ඇති ජාතික පොලිස් කොමිෂන් සභා ප්‍ර‍ධාන කාර්යාලයේ දී 2023 මැයි මස 16 වන දින රාජකාරී ආරම්භ කරන ලදී.

ජාතික පොලිස් කොමිෂන් සභාව සභාපති ඇතුළුව සාමාජිකයින් හත් දෙනෙකුගෙන් සමන්විත වන අතර තවත් සාමාජිකයින් දෙදෙනෙකු පත්කිරීමට නියමිතව ඇත. 2022 ඔක්තෝම්බර් මස 31 වන දින පාර්ලිමේන්තුව විසින් සම්මත කරන ලද ආණ්ඩුක්‍ර‍ම ව්‍යවස්ථාවේ 21 වන සංශෝධනය මගින් ස්වාධීන කොමිෂන් සභා නමයක් (09) පත් කිරිමට අපේක්ෂා කෙරිණ. ජාතික පොලිස් කොමිෂන් සභාව මෙම ස්වාධීන කොමිෂන් සභා නමයෙන් එකක් වන අතර ශ්‍රි ලංකා පොලිසිය සහ පොලිස් නිලධාරීන් සම්බන්ධයෙන් පුළුල් බලතල සහිත අධීක්ෂණ කාර්ය භාරයක් ඊට පැවරේ. ස්වාධීන කොමිෂන් සභාවක් ලෙස ජාතික පොලිස් කොමිෂන් සභාව ප්‍ර‍ථම වරට ස්ථාපිත කරන ලද්දේ 17 වන ව්‍යවස්ථා සංශෝධනය යටතේ 2002 වර්ෂයේ දී වන අතර අනතුරුව කලින් කල සිදුවූ ව්‍යවස්ථාමය වෙනස්කම් අනුව එහි බලතල සංයුතියේ වෙනස්කම් සිදු විය. පොලිස් සේවාව වෙනුවෙන් ස්වාධීන කොමිෂන් සභාවක් ස්ථාපිත කිරීමේ මූලික අරමුණ වනුයේ පොලිස් දෙපාර්තමේන්තුව හෝ පොලිස් සේවය නිර්දේශපාලනීකරණය කර රටේ නීතියේ ආධිපත්‍ය ස්ථාපිත කිරීමයි. 21 වන සංශෝධනය යටතේ අභිනවයෙන් ස්ථාපිත කෙරුණු ජාතික පොලිස් කොමිෂන් සභාවේ බලාධිකාරයට අනුව පොලිස් සේවාවේ පොලිසිය සම්බන්ධයෙන් පුළුල් බලතල හිමිවේ. එනම්, පොලිස්පතිවරයා හැර පොලිස් නිලධාරීන් පත් කිරීම්, උසස් කිරීම්, ස්ථාන මාරු කිරීම්, සේවයෙන් පහ කිරීම් සහ විනය පාලන කටයුතු සහ පොලිස් නිලධාරීන් හෝ පොලිස් සේවයට එරෙහිව මහජනතාව විසින් සිදු කරන මහජන පැමිණිලි භාර ගෙන විමර්ශනය කිරිම සහ සහන සැලස්වීම් කොමිෂන් සභාවට පැවරී ඇත. මීට අමතරව ඉහත කාර්යයන් සඳහා කාර්ය පටිපාටි සැකසීම, පුහුණුව සහ පොලිස් සේවයේ කාර්යක්ෂමතාවය හා ස්වාධීනත්වය වැඩිදියුණු කිරීම, ජාතික හා පළාත් අංශයේ අවි ආයුධ, වෙඩි ද්‍රවය සහ වෙනත් උපකරණවල ස්වභාවය සහ වර්ගය නිශ්චය කිරීම, චර්යා සංග්‍රහ සහ විනය පටිපාටි ඇතුළු පොලිස් නිලධරයන් සම්බන්ධයෙන් සියලු කාරණා සඳහා කටයුතු සැලසීම ද කොමිෂන් සභාවේ විෂය පථයට ඇතුලත් වේ

ජාතික පොලිස් කොමිෂන් සභාව,
අංක 09 ගොඩනැගිල්ල, BMICH පරිශ්‍රය, බෞද්ධාලෝක මාවත, කොළඹ 07,
ශ්‍රී ලංකාව.